الخميس 28 مارس 2024
اقتصاد

بوقنطار: كل مايجب معرفته حول المعاملات بالشيك

بوقنطار: كل مايجب معرفته حول المعاملات بالشيك عبد الرزاق بوقنطار
كل مستهلك يسمع بالشيك ولم يفهم كيفية التعامل به، ولا كيستعمل الشيك ولم يعرف السلبيات والإيجابيات للتعامل به. بعد عدة لقاءات مع بعض المسؤولين البنكيين كمجتمع مدني يهتم بالاستهلاكية بالمغرب حول كيفية تعامل الأجير والموظف والمستهلك العادي مع الشيك، بطبيعة الحال المعاملات التجارية بالشيك لا يشملها قانون 31/08 الخاص بحماية المستهلك.
سننقل لكم بالعامية أي الدارجة المغربية بعض الخلاصات حول التعاملات بالشيك:
"غانهضر ليكوم" على الشيك وأنواعه باش تكون عندكم فكرة عامة عليه وباش تكونو على بال منو حيت ماشي ديال اللعب.
الشيك هو وسيلة للأداء يعني كانخلص بيه واحد المعاملة استهلاكية بالشيك لي كايسالني شي حاجة هاد الشيك ممكن يدوز من يد ليد يعني الملكية ديالو يمكن تحول من شخص لشخص، نتا تخلصني بشيك وأنا نخلص واحد آخر بهاداك الشيك ديالك وهي غادا هاد العملية كاتسمى التظهير l'endossement. الطريقة هي أنني كانسيني في الظهر ديال الشيك ونعطيه لآخر، وهو كايدير نفس الشيء و هاد العملية ماعندهاش حدود إلى عمر الشيك منverso ديالو (موراه) كان معاه ورقة عادية كاتسمى allonge و نكملو فيها التوقيعات.
 شناهو Chèque barré: هو ملي كايدارو 2 شرطات // متوازيين ف Recto ديال الشيك يعني من القدام ، وغالبا كايكونو الفوق على ليسر : المعنى ديالو أن هاد الشيك مايمكنش يتصرف Espèce (باستثناء مولاه) خاصك تدفعو فالحساب ديالك يعني كادير Remise للشيك فحسابك وكايدوزو الفلوس من حساب مول الشيك لحسابك، إلى كان الشيك لي دفعتي لمولاه في نفس الوكالة لي أنتا فيها. الفلوس راغايدوزو فيه sur place أويلا كنتو في نفس البنكة، أولا كنتو في وكالاتين مختلفتين غايدوزو الفلوس على يومين، إلى كان فبنك مغاير للبنك ديالك في ثلاثة أيام،هادشي الى كانت provision أما الى ماكانوش راك كتسلم من البنك شهادة رفض الأداء certificat de refus de paiement .
الشيك فاش كايكون عادي ماشي  barré وبغيت نتخلص فيه ""espèce"" نرد البال le lieu de paiement مكان الأداء كايكون في الشيك كيعني البلاصة فين غانتخلص فيه، على الغالب كايكون الوكالة لي فاتح فيها مول الشيك، بمعنى غايخصك تمشي للوكالة ديالو باش تخلص كاش إلى مامشيتيش للوكالة ديالو وخاصك تدفع الشيك فحسابك، باستثناء بعض الحالات كايكون عندهوم الشيك فيه يؤدى في جميع وكالات البنك الفلاني. هذا تصرفو فأي وكالة ديال ديك البنكة.
الشيك عطيتو للسيد "فلان" ولو تكتب سميتو في الشيك يمكن يستفيد منو أي شخص و يبقا كايدور من يد ليد (هادشي لي سميناه التظهير l'endossement) ماعادا إلى كتبت في الشيك من الفوق: N.E أو NON ENDOSSABLE أو غير قابل للتظهير هاكذا غايولي دور عند ديك La case ديال المستفيد بحيث أن هاداك لي محددو فالشيك الوحيد لي يمكن ليه يستافد من الشيك ومايمكنش يعطيه لشي حد آخر ؛ ويلا كان الشيك barré و مكتوبة فيهN.E فغاتكونو فهمتو بلي الوحيد لي غايستافد من الشيك هو لي مكتوب في بلاصة المستفيد و غايخصو يدير ليه remise (يدفعو في الحسابcompte ديالو)
 شيك سرتفييchèque certifié.
هاذ العملية ديال إثبات الشيك certification du chèque كاتعني ببساطة أن البنك هو لي كايضمن الأداء للمستفيد مثلا فاش كاتشري سيارة من عند شي شركة كاطلب ليك شيك certifie هي ماشغلهاش فديك الهدرة ديال ماعندكش الفلوس ولا signature mamgadach أو أو ... هاكا هي كاتولي تعرف البنكة ماشي نتا كيفاش كاتم هاد العملية؟ فاش كاتمشي تسيرتفيي الشيك عند البنكة ديالك البنكة كتأكد بلي عندك داك المبلغ في الحساب وكادوز certification عندها فيsystème هاكا دوك الفلوس كايخرجو داك الساعة من الكونط ديالك و كايبقاو فواحد الكونطinterne ديال البنكة و البنكة كاطبع ليك ف الشيك بلي certifié نتا فاش كاتعطي داك الشيك لشي حد و كايدفعو كايخرجو الفلوس من داك الكونط interne ديال البنكة و كاياخدهم داك المستفيد . 
هاذ العملية يؤدى عليها و كاتبقا هاد certification ديال الشيك لمدة 20 يوم فقط.
 دفعت شيك في الحساب ديالي و رجع impayé ماتخلصش ماشي بالضرورة غايكون رجع على الفلوس ممكن يكون ماتخلصش لأسباب أخرى بحال :
التوقيع لي في الشيك ماصحيحش La Non Conformité
حاجة أخرى مهمة جدا، le chèque est un moyen de paiement a vue يعني مكيتحكمش فيه التاريخ واخا تدير فيه سنة 2060 من حقي نتخلص فيه غدا. و نزيدك للنصيحة اللي عطا الشيك لشي واحد يحدد فيه الاسم ديال"فلان" و يكتب فيه N.E باش ميسبب ليه شي كارثة و يحدد المبلغ. خصوصا ناس تأجير السيارات راه كتغامر بشيك خاوي تمشي فيه للحبس و لا يدي ليك رزقك و معندك ما تصور. 
كاين بزاف مايتقال فهاد الموضوع المهم غير تعرفو البرانسيب ديال الشيك أو باش ماتلعبوش بيه حيث لا قدر الله ....
 
عبد الرزاق بوقنطار، رئيس جمعية حماية المستهلك بالمحمدية /عضو المكتب التنفيذي للجامعة الوطنية لجمعيات المستهلك